Vlerat e muajit Shaban 

Falënderimi i takon Allahut; Atë e lavdërojmë, prej Tij  ndihmë dhe falje kërkojmë, dhe tek Allahu kërkojmë mbrojtje nga të këqijat e vetes sonë dhe nga veprat tona të liga. Kë Allahu e udhëzon, askush nuk mund ta humbasë; e kë Ai e humb, askush nuk mund ta udhëzojë. Dëshmoj se nuk ka të adhuruar tjetër me të drejtë përveç Allahut, Një e të Pashoq, për madhërimin e Çështjes së Tij; dhe dëshmoj se Muhamedi është robi dhe i Dërguari i Tij, i dashuri i Tij. Paqja dhe bekimi i Allahut qofshin mbi të, mbi familjen e tij dhe shokët e tij, dhe mbi ata që i pasuan me mirësi deri në Ditën e Gjykimit; dhe selam i shumtë.

Më pastaj, Kini frikë Allahun, o robër të Allahut,  me frikën e vërtetë që i takon Atij; dhe dijeni se trupat tuaj nuk e përballojnë zjarrin.

1- O robër të Allahut, muaji Shaban është muaji që i paraprin muajit të Ramazanit dhe e përgatit atë. Për këtë arsye disa nga të parët e umetit, kur hynte Shabani, i përkushtoheshin mus’hafëve dhe i lexonin ata, nxirrnin zekatin e pasurisë së tyre, për t’i forcuar të dobëtit dhe të varfrit që të përballonin agjërimin e Ramazanit. Prandaj mos e neglizhoni agjërimin e asaj që keni mundësi nga ditët e tij, duke synuar shpërblimin, sepse në të ka vlerë agjërimi; dhe nga urtësitë e agjërimit të tij është përgatitja e shpirtrave për agjërimin e Ramazanit. Usame ibn Zejdi, Allahu qoftë i kënaqur me të dy, ka thënë: “O i Dërguari i Allahut, nuk të kam parë të agjërosh nga muajt aq sa agjëron nga Shabani?” Ai tha: “Ky është një muaj që njerëzit e lënë pas dore, mes Rexhebit dhe Ramazanit; është muaj në të cilin veprat ngrihen te Zoti i botëve, i Lartësuar e i Madhëruar, dhe më pëlqen që vepra ime të ngrihet ndërsa jam agjërueshëm.” (E transmetuan Ahmedi dhe Nesaiu, me zinxhir të mirë).

2- O robër të Allahut, ky muaj i madh rrethohet nga dy muaj të mëdhenj: muaji i shenjtë Rexheb dhe muaji i agjërimit; kështu njerëzit u morën me ta dhe e lanë atë pas dore, duke u bërë i shpërfillur. Në këtë ka një tregues nga Profeti ﷺ se ndonjëherë disa kohëra, edhe pse fama e tyre është më e madhe, mund të jenë më pak të vlefshme se kohëra të tjera.

3- O robër të Allahut, në muajin Shaban i paraqiten Allahut, të Lartësuarit, veprat e robit gjatë vitit. Kjo paraqitje është tjetër nga paraqitja javore. Profeti ﷺ ka thënë: “Dyert e Xhenetit hapen ditën e hënë dhe ditën e enjte, dhe falet çdo rob që nuk i shoqëron Allahut asgjë, përveç një burri që ka armiqësi mes tij dhe vëllait të tij; dhe thuhet: ‘Prolongoni këta të dy derisa të pajtohen, prolongoni këta të dy derisa të pajtohen, prolongoni këta të dy derisa të pajtohen.’” (Transmetuar nga Muslimi).

4- O robër të Allahut, agjërimi i shumicës së Shabanit është sunet i vërtetuar nga i Dërguari i Allahut ﷺ. Aishja, Allahu qoftë i kënaqur me të, ka thënë: “I Dërguari i Allahut ﷺ nuk agjëronte  në ndonjë muaj të vitit  më shumë se sa që agjëronte në Shaban.” (Buhariu dhe Muslimi). Në një transmetim tjetër të tyre: “Ai e agjëronte të gjithë Shabanin.”

5- Po ashtu ajo, Allahu qoftë i kënaqur me të, ka thënë: “Muaji më i dashur për të Dërguarin e Allahut ﷺ që ta agjëronte ishte Shabani; madje e lidhte atë me Ramazanin.” (Transmetuar nga Nesaiu, me zinxhir të saktë).

6- Nga Ummu Seleme, Allahu qoftë i kënaqur me të, transmetohet se ka thënë: “Nuk e kam parë të Dërguarin e Allahut ﷺ të agjëronte dy muaj rresht përveç Shabanit dhe Ramazanit.” (Transmetuar nga Tirmidhiu, me zinxhir të saktë).

7- O robër të Allahut, në agjërimin e Shabanit ka dëshmi për pëlqyeshmërinë e gjallërimit të kohëve që njerëzit i lënë pas dore me adhurim. Kjo është nga veprat më të vështira për shpirtrat dhe kërkon durim e përpjekje. Për agjëruesit është caktuar një derë në Xhenet, e quajtur dera Er-Rejjan.

8- Nga veprat vullnetare më të mira janë ato që janë afër Ramazanit, para dhe pas tij. Ato i bashkohen agjërimit të Ramazanit për shkak të afërsisë me të dhe pozita e tyre ndaj agjërimit është si pozita e suneteve të rregullta ndaj farzeve, para dhe pas tyre; kështu ato i bashkohen farzeve në vlerë dhe janë plotësim për mangësitë e farzeve. Po kështu është edhe agjërimi para dhe pas Ramazanit.

9- O robër të Allahut, mes njerëzve është bërë i njohur hadithi: “Kur të hyjë gjysma e Shabanit, mos agjëroni deri në Ramazan.” Këtë hadith e kanë mohuar imamë të mëdhenj të hadithit, aq sa Imami Ahmed, Allahu e mëshiroftë, ka thënë: “El-Alai nuk ka transmetuar hadith më të refuzuar se ky.”

10- Ebu Bekr el-Ethrem, Allahu e mëshiroftë, ka thënë: “Të gjitha hadithet e tjera e kundërshtojnë atë.” Ndërsa Tahaviu, Allahu e mëshiroftë, ka thënë: “Ky hadith është i shfuqizuar dhe ka konsensus për mosveprimin sipas tij.”

11– O robër të Allahut, dijeni se më e sakta nga ajo që është transmetuar për natën e gjysmës së Shabanit është ajo që ka nxjerrë Imami Ahmed, Allahu e mëshiroftë: “Allahu i Lartësuar shikon krijesat e Tij natën e gjysmës së Shabanit dhe i fal robërit e Tij, përveç dyve: atij që mban armiqësi dhe atij që vret një njeri.” Shumica e dijetarëve janë të mendimit për dobësimin e tij. Në një transmetim te Ibn Maxhe thuhet: “përveç idhujtarit ose atij që mban armiqësi.” Edhe sikur të ishte i saktë, nuk ka në të argument për veçimin e ditës me agjërim apo të natës me namaz nate. Falja e Allahut, sipas hadithit, nuk lidhet me agjërim apo me namaz nate, por lidhet me teuhidin dhe pastrimin e shpirtrave nga urrejtjet dhe armiqësitë. Prandaj shqyrtoje veten, o rob i Allahut, dhe kontrollo brendësinë e saj; ndoshta je i sprovuar me diçka nga shirkjet. Mos thuaj: “Unë jam i mbrojtur nga shirku, nuk mund të bie në të”; kjo është mashtrim dhe padituri. Nëse babai i profetëve, imami i monoteistëve dhe miku i të Gjithëmëshirshmit, i lutej Zotit të tij që ta largonte atë dhe bijtë e tij nga adhurimi i idhujve, siç thotë Allahu i Lartësuar duke treguar për të: “Dhe kur Ibrahimi tha: ‘O Zoti im, bëje këtë vend të sigurt dhe më largo mua dhe bijtë e mi nga adhurimi i idhujve’”, atëherë kush mund të ndihet i sigurt nga sprova pas Ibrahimit? Ibrahimi et-Tejmi, Allahu e mëshiroftë, ka thënë: “Kush mund të ndihet i sigurt nga sprova pas Ibrahimit?” Prandaj askush nuk është i sigurt nga rënia në shirk, përveç atij që është i paditur për të dhe për atë që e pastron prej tij. Për këtë arsye Profeti ﷺ ka thënë: “Gjëja që më frikëson më së shumti për ju është shirku i vogël.” U pyet për të dhe tha: “Rijaja (syefaqësia).” (Hadith i mirë, transmetuar nga Ahmedi dhe të tjerë).

13- Kjo nuk kufizohet vetëm në natën e gjysmës së Shabanit, por Profeti ﷺ ka thënë: “Dyert e Xhenetit hapen ditën e hënë dhe ditën e enjte, dhe falet çdo rob që nuk i shoqëron Allahut asgjë, përveç një burri që ka armiqësi mes tij dhe vëllait të tij; dhe thuhet: ‘Shtyjini këta të dy derisa të pajtohen, shtyjini këta të dy derisa të pajtohen, shtyjini këta të dy derisa të pajtohen.’” (Muslim).

14- Armiqësia më e madhe nga e cila duhet pasur kujdes është ajo që mbajnë shpirtrat e sëmurë ndaj shokëve të Muhamedit ﷺ. Prej saj është ajo që mbajnë rafiditë ndaj Ebu Bekrit, Omerit, Othmanit, Aishes dhe Muavijes, Allahu qoftë i kënaqur me ta, dhe ndaj shumicës së shokëve të Muhamedit ﷺ. Po kështu kërkohet pastërtia e gjoksit ndaj selefëve të umetit, dijetarëve të tij, prijësve të çështjes dhe dijetarëve të Islamit, si dhe ndaj mbarë muslimanëve, dhe dëshirimi i së mirës për ta.

Këtë e them dhe i kërkoj falje Allahut të Madhëruar për mua dhe për ju nga çdo mëkat; prandaj kërkojini falje Atij.

Hutbeja e dytë

Falënderimi i takon Allahut për mirësinë e Tij; falënderimi i takon Atij për madhështinë e begative dhe dhuntive të Tij. Dëshmoj se nuk ka të adhuruar tjetër me të drejtë përveç Allahut, Një dhe i pashoq; dhe dëshmoj se Muhamedi është robi dhe i Dërguari i Tij, miku i Tij i ngushtë. Paqja dhe bekimi i Allahut qofshin mbi të, mbi familjen e tij dhe shokët e tij, dhe mbi ata që i pasuan me mirësi deri në Ditën e Gjykimit; dhe selam i shumtë.

Pas kësaj: kini frikë Allahun, o robër të Allahut,  me frikën e vërtetë që i takon Atij; dhe kapuni fort pas Islamit me lidhjen më të fortë; dhe dijeni se trupat tuaj nuk e përballojnë zjarrin.

O robër të Allahut; është e domosdoshme të tërhiqet vëmendja për rëndësinë e shlyerjes së ditëve të mbetura nga Ramazani, për shkak të ngushtësisë së kohës. Ka prej atyre që kanë ditë për t’i shlyer nga Ramazani, por rrethanat dhe angazhimet ua kanë penguar shlyerjen, ose kanë harruar apo janë lënë në harresë; prandaj le të nxitojnë në shlyerje. Po ashtu, familjarët le të kenë kujdes që t’ia kujtojnë njëri-tjetrit atë që kanë për të shlyer, dhe le t’i shfrytëzojnë këto ditë që dallohen për shkurtësinë e ditës, moderimin e motit dhe vlerën e muajit. Allahu i ndihmoftë të gjithë në këtë.

O Allah, na ndihmo! O Allah, na ndihmo! O Allah, na ndihmo! O Allah, na trajto me atë që Ti e meriton, e mos na trajto sipas asaj që ne e meritojmë. Ti je Zot i bujarisë, fisnikërisë, mirësisë dhe bamirësisë.

O Allah, Ti je Falës dhe e do faljen, prandaj na fal.

O Allah, të kërkojmë mirëqenie në këtë botë dhe në botën tjetër.

O Allah, shtrije mbi ne mbulesën Tënde në këtë botë dhe në botën tjetër. O Allah, na e përmirëso nijetin, pasardhësit, bashkëshortët dhe fëmijët. O Allah, na bëj udhërrëfyes të udhëzuar. Zoti ynë, na jep të mira në këtë botë dhe të mira në botën tjetër, dhe na ruaj nga dënimi i zjarrit. I pastër është Zoti yt, Zoti i Madhërisë, nga ajo që i përshkruajnë; paqja qoftë mbi të dërguarit; dhe falënderimi i takon Allahut, Zotit të botëve. Çohuni për  namazin tuaj, Allahu ju mëshiroftë.

Shejh Dr. Salih bin Mukbil Elusajmij

Përktheu dhe përshtati
Thirrja.org Nisma për zhvillimin e imamëve – thirrësve