Prishtinë, më 14 nëntor 2024
Kryetari i Bashkësisë Islame të Kosovës, Myftiu Naim ef. Tërnava, ka pritur në takim një delegacion nga Drejtoria e Përgjithshme e Vakëfeve të Turqisë, të kryesuar nga shefi i Departamentit për Marrëdhënie me Jashtë, z. Kadir Kantekin.
Kjo vizitë erdhi si rezultat i bashkëpunimit të mirë ndërmjet Bashkësisë Islame të Kosovës dhe Drejtorisë së Përgjithshme të Vakëfeve, ku me këtë rast u nënshkrua edhe një memorandum bashkëpunimi për mobilimin e Medresesë së Vogël dhe ndërtesës së konviktit në qytetin e Gjakovës.
Myftiu Tërnava falënderoi z. Kantekin dhe nëpërmes tij tërë Drejtorinë e Përgjithshme të Vakëfeve për bashkëpunimin e mirë që kanë pasur deri më tani me Bashkësinë Islame të Kosovës, duke veçuar kështu restaurimin e shumë xhamive me rëndësi për trashëgiminë kulturore dhe fetare në tërë territorin e Kosovës. Ai shprehu gatishmërinë e tij dhe të institucionit që ai drejton që bashkëpunimi i deritanishëm të vazhdojë edhe në të ardhmen.
Nga ana e tij, z. Kantekin, falënderoi Myftiun Tërnava për pritjen dhe për bashkëpunimin e treguar ndër vite me Drejtorinë e Përgjithshme të Vakëfeve. Ai tha se mbesim të përkushtuar që edhe më tej të vazhdojmë të punojmë së bashku në të gjitha fushat që mund të kontribuojmë si institucione.
Burimi
* Rubrika e informacioneve sjell lajme nga aktivitetet që organizojnë institucione islame organizata islame, thirrës apo ngjarje të tjera me interes për komunitetin musliman. Sjellja e informacioneve nuk nënkupton pajtueshmëri të redaksisë së Thirrja.org me ngjarjet apo përmbajtjen e informacioneve që sillen.
